ਬਾਇਡਨ ਵੱਲੋਂ ਕੌਮੀ ਬੁਨਿਆਦੀ ਢਾਂਚਾ ਸਲਾਹਕਾਰ ਕੌਂਸਲ ਲਈ ਦੋ ਭਾਰਤੀ-ਅਮਰੀਕੀ ਨਿਯੁਕਤ
ਵਾਸ਼ਿੰਗਟਨ-ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਭਾਰਤੀ-ਅਮਰੀਕੀ ਮਨੂ ਅਸਥਾਨਾ ਤੇ ਮਧੂ ਬੇਰੀਵਾਲ ਨੂੰ ਆਪਣੀ ਕੌਮੀ ਬੁਨਿਆਦੀ ਢਾਂਚਾ ਸਲਾਹਕਾਰ ਕੌਂਸਲ ਵਿੱਚ ਸ਼ਾਮਲ ਕਰਨ ਦਾ ਐਲਾਨ ਕੀਤਾ ਹੈ। ਰਾਸ਼ਟਰਪਤੀ ਦੀ ਕੌਮੀ ਬੁਨਿਆਦੀ ਢਾਂਚਾ ਸਲਾਹਕਾਰ ਕੌਂਸਲ (ਐੱਨਆਈਏਸੀ) ਵ੍ਹਾਈਟ ਹਾਊਸ ਵਿੱਚ ਭੌਤਿਕ ਅਤੇ ਸਾਈਬਰ ਜੋਖਿਮ ਘੱਟ ਕਰਨ ਅਤੇ ਦੇਸ਼ ਦੇ ਮਹੱਤਵਪੂਰਨ ਬੁਨਿਆਦੀ ਢਾਂਚਿਆਂ ਦੀ ਸੁਰੱਖਿਆ ਵਿੱਚ ਸੁਧਾਰ ਲਿਆਉਣ ਲਈ ਸੁਝਾਅ ਦਿੰਦੀ ਹੈ। ਐੱਨਆਈਏਸੀ ਲਈ ਬੁੱਧਵਾਰ ਨੂੰ ਬੈਂਕਿੰਗ, ਵਿੱਤੀ, ਆਵਾਜਾਈ, ਊਰਜਾ, ਪਾਣੀ, ਡੈਮ, ਰੱਖਿਆ, ਸੰਚਾਰ, ਸੂਚਨਾ ਤਕਨਾਲੋਜੀ, ਸਿਹਤ ਸੇਵਾਵਾਂ, ਖਾਧ ਅਤੇ ਖੇਤੀ, ਸਰਕਾਰੀ ਸਹੂਲਤਾਂ, ਐਮਰਜੈਂਸੀ ਸੇਵਾਵਾਂ ਅਤੇ ਉੱਚ ਸਿੱਖਿਆ ਦੇ ਖੇਤਰ ਨਾਲ ਸਬੰਧ ਰੱਖਣ ਵਾਲੇ 26 ਜਣਿਆਂ ਦੇ ਨਾਵਾਂ ਦਾ ਐਲਾਨ ਕੀਤਾ ਗਿਆ। ਅਸਥਾਨਾ ਉੱਤਰੀ ਅਮਰੀਕਾ ਵਿੱਚ ਸਭ ਤੋਂ ਵੱਡੇ ਪਾਵਰ ਗਰਿੱਡ ਪੀਜੇਐੱਮ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਅਤੇ ਮੁਖੀ ਹਨ। ਮਧੂ ਬੇਰੀਵਾਲ ਨੇ 1985 ਵਿੱਚ ਇਨੋਵੇਟਿਵ ਐਮਰਜੈਂਸੀ ਮੈਨੇਜਮੈਂਟ (ਆਈਈਐੱਮ) ਦੀ ਸਥਾਪਨਾ ਕੀਤੀ ਸੀ। ਉਹ ਆਈਈਐੱਮ ਦੀ ਸੀਈਓ ਅਤੇ ਮੁਖੀ ਹੈ।