ਬਾਇਡਨ ਵੱਲੋਂ ਦੋ ਭਾਰਤੀ-ਅਮਰੀਕੀ ਐਕਸਪੋਰਟ ਕੌਂਸਲ ਵਿੱਚ ਸ਼ਾਮਲ
ਵਾਸ਼ਿੰਗਟਨ-ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਦੋ ਉੱਘੇ ਭਾਰਤੀ-ਅਮਰੀਕੀਆਂ ਨੂੰ ਆਪਣੀ ਬੇਹੱਦ ਅਹਿਮ ‘ਐਕਸਪੋਰਟ ਕੌਂਸਲ’ (ਬਰਾਮਦ ਪਰਿਸ਼ਦ) ਵਿਚ ਮੈਂਬਰਾਂ ਵਜੋਂ ਨਿਯੁਕਤ ਕਰਨ ਦਾ ਐਲਾਨ ਕੀਤਾ ਹੈ। ਇਹ ਪਰਿਸ਼ਦ ਕੌਮਾਂਤਰੀ ਵਪਾਰ ਬਾਰੇ ਪ੍ਰਮੁੱਖ ਕੌਮੀ ਸਲਾਹਕਾਰ ਕਮੇਟੀ ਦੇ ਤੌਰ ਉਤੇ ਕੰਮ ਕਰਦੀ ਹੈ। ਰਾਸ਼ਟਰਪਤੀ ਨੇ ਕਾਰਪੋਰੇਟ ਆਗੂਆਂ ਪੁਨੀਤ ਰੰਜਨ ਤੇ ਰਾਜੇਸ਼ ਸੁਬਰਾਮਣੀਅਮ ਨੂੰ ਕੌਂਸਲ ਵਿਚ ਨਿਯੁਕਤ ਕਰਨ ਬਾਰੇ ਆਪਣੀ ਇੱਛਾ ਮੰਗਲਵਾਰ ਨੂੰ ਜ਼ਾਹਿਰ ਕੀਤੀ। ਪੁਨੀਤ ‘ਡੇਲੌਇਟ ਕੰਸਲਟਿੰਗ’ ਦੇ ਸਾਬਕਾ ਸੀਈਓ ਹਨ ਤੇ ਰਾਜੇਸ਼ ਸੁਬਰਾਮਣੀਅਮ ‘ਫੈੱਡਐਕਸ’ ਤੇ ਪ੍ਰਧਾਨ ਤੇ ਸੀਈਓ ਹਨ। ਕੌਂਸਲ ਦੀ ਅਗਵਾਈ ਮਾਰਕ ਐਡਿਨ ਕਰਨਗੇ ਜੋ ਕਿ ‘ਕੈਸਲ ਸਿਸਟਮਜ਼’ ਦੇ ਚੇਅਰਮੈਨ ਹਨ। ਰਾਸ਼ਟਰਪਤੀ ਦੀ ‘ਐਕਸਪੋਰਟ ਕੌਂਸਲ’ ਵਿਚ ਕਾਰਪੋਰੇਟ ਸੈਕਟਰ ਦੇ ਦੋ ਦਰਜਨ ਤੋਂ ਵੱਧ ਆਗੂਆਂ ਨੂੰ ਸ਼ਾਮਲ ਕੀਤਾ ਗਿਆ ਹੈ।